أزاي أشتغل في الإعلانات؟

لو حابب تسمع ال Podcast كامل تقدر تدخل على اللينك دة

https://yallatree.com/p/collagepodcast

أحد الأصدقاء سأل.. عاوز أشتغل في مجال الإعلانات.. أعمل إيه؟ 

في البداية.. و قبل ما أبدأ كلامي محتاج تكون عارف بعض الأمور عن مجال العمل دة عشان تقدر تحدد بضبط إذا كان دة مجال العمل المناسب ليك و لتوقعاتك و متطلباتك ولا لأ.

الشغل في مجال الإعلانات أنا بحب أسميه Creative Work On Demand.. بمعنى إيه؟ 

أنت عشان تقرر تشتغل في مجال الإعلانات فأنت بالضرورة شايف في نفسك طاقة إبداعية بطريقة أو بأخرى.. ممكن تكون بتكتب.. ممكن تكون بترسم.. بتلحن.. في النهاية بتقدر تطلع منتج إبداعي معين.. و شايف إن الإعلانات ممكن تكون بيئة خصبة تطلع فيها إبداعاتك دي. 

طيب إمتى بقى تكون الإعلانات بيئة مناسبة ليك؟ و إيه معنى كلمة Creative On Demand دي؟ 

بص يا عزيزي.. من الآخر كدة.. إنت لما بتشتغل في الإعلانات فأنت في حد بيدفعلك فلوس عشان يستفيد من قدرة إبداعية عندك لبيع منتجه أو خدمته.. و بالتالي أنت بتبدع ولكن في سياق تحقيق رغبة الشخص اللي بيدفعلك الفلوس.. و بالتالي رؤيتك الخاصة بتكون مساحتها محدودة بالمقارنة بالقوالب الإبداعية الأخرى.. و اللي برضه مساحة الإبداع فيها مش مطلقة و لكن بتكون مساحة أوسع بعض الشيء من غيرها في الإعلانات. 

و بالتالي دي نقطة من الضروري إنك تكون عارفها و مدركها و متصالح معاها.. لأنه في اللحظة اللي هتكون فيها قاعد على الترابيزة مع عميل و تختلف وجهة نظرك عن وجهة نظره فاللي كلمته هتمشي هو العميل.. 

فهمك لدة هيحميك من صدمة إدراك إنه "إيه دة.. تباً للرأس مالية" و هيخليك تتبع مدرسة الأستاذة نسرين أمين "ما أنت دافع بقى" 

أدركت دة؟ متصالح معاه؟ نخش على اللي بعده. 

أنا لا أدعي تماماً إني مخضرم و صاحب خبرة جبارة في عالم الإعلانات و لكني أملك من التجربة ما يسمحلي بمشاركتها معاك و أنت تاخد منها اللي أنت عاوزه. 

أنا بداية رغبتي في العمل في مجال الإعلانات بدأت من منطقة الكتابة.. وزيك بضبط كنت كنت شايف إن عندي أفكار تصلح لإعلانات.. و من هنا كانت الخطوة الأولى

1- المذاكرة 

واحدة من المشاكل اللي بيقع فيها كتير من راغبي العمل في أي مجال إبداعي إنهم بيضيعوا أغلب الوقت في الشكوى من عدم وجود فرص عمل على حساب استغلال الوقت دة في تعلم الشيء اللي عاوزين يشتغلوا فيه.. و هي من الحاجات اللي أدركتها بدري و قررت إني أذاكر الشغلانة اللي عاوز أشتغلها.. بس ذاكرت إزاي؟ 

البداية كانت من التعرف على عالم الصناع و آباء المهنة دي.. بدأت أعرف أكتر عن طارق نور و جيله.. و شكل الإعلانات وقتهم كانت عاملة إزاي.. و بعدها بدأت أدخل على جيل الصناع الجدد اللي هم بقوا أساتذة المرحلة.. زي محمد حمد الله و علي علي و ماجد نصار و عمر هلال و تميم يونس و غيرهم كتير. 

بدأت بعدها أدور على Courses و MasterClasses و Workshops Online ليهم.. و اللي فادني كتير إني أتعرف على العالم دة من خلال ناس قدروا يحققوا نجاح واضح و كبير وملموس.. لدرجة إن كل واحد فيهم بقى عنده مدرسته الخاصة. 

مقدرش أقولك إن دة هيعملك فنيات كتابة أو إخراج الإعلان بقدر ما هو هيفهمك طبيعة العالم و عقلية الناس اللي بتطلعلك منتجات مبهرة زي دي. 

طيب أتعلم الفنيات إزاي؟ 

من المميزات البديهية للإنترنت و التي لا تخفى على أحد هي إنك لو كتبت أي حاجة في جوجل هتطلعلك ليها آلاف المصادر التعليمية و المتاحة بكل اللغات.. و لكن في رأيي إنه في الإعلانات بالذات المذاكرة النظرية لفنيات الكتابة مش مفيدة بقدر ما المذاكرة العملية ممكن تكون مجدية أكتر.. إزاي؟ 

لو جربت تجمع تجمع كل إعلانات واحد من النماذج اللي اتكلمنا عنهم دي و بدأت تكسرها أو تعملها Break Down و تشوفها بضبط هو عمل إيه عشان يطلع الإعلان حلو دة هيكون مفيد ليك أكتر ما تذاكر كلام نظري عن فن الكتابة للإعلانات أو ال Copywriting 

و دي مش عملية مرتبطة بس بوجودك في بداية رحلتك.. دي هتكمل معاك للنهاية.. يعني مش هينفع إنك في وقت تقول أنا والله مش حابب إني أذاكر الشغل الجديد لأني خلاص بقيت خبير و بقالي سنين بعمل دة.. لازم تعرف إيه الجديد.. هل التركيز على الكتابة؟ ولا على المزيكا؟ ولا على الشكل البصري؟ كل دي أسئلة ضروري تكون مركز فيها. 

طيب ذاكرت و كسرت إعلانات قد كدة.. أعمل إيه بعدها؟ 

حلو جداً.. طبق

سهل جداً إنك تسمع من صناع و سهل جداً إنك تكون فاهم أسلوبهم في الشغل.. لكن مش سهل إنك تطبق دة في صورة منتج فعلي.

طيب أنا دلوقتي لسة مش بشتغل و بقولك عاوز أدور على فرصة.. يبقى لازم أشتغل عشان أعرف أطبق.. مش كدة ولا إيه؟ 

لأ مش كدة.. أهمية إنك تعمل شغل حتى لو مش هيتعرض ولا حد هيشوفه إنك تدي أمارة للصناع إنك بتعرف تعمل دة.. أو اللي بيسموه ال Proof Of Concept. 

أصل أنت مش هتروح لعميل أو ل Agency و تقولهم "أقسم بالله بعرف أكتب إعلانات" أدوني فلوس عشان أديكوا مجهودي! 

سواء العميل أو الوكالة اللي أنت عاوز تتعامل معاها محتاجين يكونوا عندهم الحد الأدنى من الضمان إنك بتعرف تعمل الحاجة دي عشان يدوك مقابل مادي ليها.. و بالتالي لحد ما شخص أو جهة يتحمسوا ليك و يقرروا يحطوا ثقتك عندك.. لازم تدي أمارة. 

جرب تمسك إعلان حلو جداً لبراند أو علامة تجارية أنت بتحبها.. و أعملهم إعلان جديد.. طبعاً لو تقدر تنفذ حاجة فدة تمام بس لو حتى هتكتفي بكتابة سكريبت أو عمل Storyboard دة هيكون أفضل من مفيش.. و نفس الموضوع اعمله في إعلان معجبكش.. و شوف هو ليه مش حلو و لو أنت هتعمله إعلان حلو هتعمله دة إزاي؟

التدريب دة هيكون مفيد ليك جداً في إنك تكسر حاجز الرهبة بين الإعلان النهائي و أنك تكتب حاجة فعلية بإيدك.. و كل ما تمرن عضلات مخج و إيدك على العملية دي كل ما هتتمكن من الموضوع أكتر. 

طيب يا سيدي أنا كتبت زي ما كتبت و بقيت ولا إسلام حسام في عزه.. أعمل إيه بعد كدة؟ 

عارف قصيدة أبيع نفسي؟ 

بمجرد ما تحس إنك بقى عندك الحد الأدنى من التمكن من المهارة اللي أنت عاوز تشتغل فيها.. لازم تبدأ تبيع نفسك.. أو بمعنى أدق فأنت لازم تعرف تعلن عن الخدمة اللي أنت بتقدمها دي.. حتى لو هتنزل تخبط على الشركات دي بنفسك.. أيوة.. زي ما سمعت.. حتى لو هتنزل تطبع شغلك و تخبط على الوكالات الإعلانية. 

و هنا محتاج تعرف حاجة مهمة جداً.. الوكالات الإعلانية مش مستوى واحد.

في وكالات هي الأضخم في السوق و دي اللي بتعمل الإعلانات الضخمة اللي أنت بتتفرج عليها في التليفزيون.. بجانب إن ليها أسم كبير في السوق و بتكون أغلبها أو كتير منها شركات متعددة الجنسيات أو Multinational.. و دي الشركات اللي بيدخلها واحد من 4.. يا إما السوبر موهوب و مبدع لدرجة إنهم هم اللي بيطلبوا منه إنه يشتغل معاهم.. أو اللي متربي تحت إيديهم زي حد كان متدرب عندهم في Summer Training أو حد Already موجود في السوق و ليه اسم تقيل و ساعتها برضه هم اللي بيحاولوا يصطادوه أو يعملوله Hunting و يشتغل معاهم.. و الأخير وهو اللي عنده وسطة.. و اللي لو مش شاطر بعد وقت بيزحلقوه. 

الشركات دي زي Wunderman Thompson و DDB و FP7 و غيرهم كتير.

ميزتها إنها شركات كبيرة جداً و هتديلك اسم حلو في السوق و هتخليك و انت صغير تشتغل على إعلانات كبيرة. 

لكن من عيوبها إنك صعب تدخلها بالمسارات العادية.. ولو دخلتها و إنت لسة صغير موعدكش إنك هتستفيد أوي.. لأنه بسبب ضخامة الشركات دي فأنت لو شغال على مشروع هتلاقي نفسك مجرد مسؤول عن تفصيلة صغيرة بس.. و هتلاقي ناس كتيرة معاك.. و دة مش هيكون أكتر حاجة مفيدة ليك في البداية و مش هينشف عضمك أو هيديك خبرة.. ودة مش عن استنتاج بقدر ما هو من تجربة عملية مع كتير من اللي بيشتغلوا في بدايتهم في الشركات دي. 

بعد الشركات الضخمة دي هتلاقي شركات قد تكون أقل في الضخامة و الشهرة و لكنها بتحاول تناطح مع الشركات دي.. زي bubble gum و زي King tut's playground و Circus و غيرهم.. و هيكون حظك حلو لو قدرت تدخل شركة من الشركات دي.. لكن في نفس الوقت الموضوع برضه مش بنفسك القدر من السهولة اللي أنت متخيله.. 

و بعدهم بتيجي الشركات أو الوكالات اللي سهل إنك تدخلها و هي الوكالات المتخصصة في إعلانات ال Digital Marketing و ال Social media.. و الميزة في الشركات دي زي ما قولنا كدة.. سهولة إنك تدخلها.. زائد إنك هتلاقي نفسك بتعمل أغلب الشغل بإيدك.. يعني ممكن تلاقي نفسك أنت الكاتب أو ال Copywriter و ال Creative Director و ال Producer كمان.. و دة على قد ما ممكن يكون مهلك ليك.. لكنه مفيد جداً في بدايتك.. لأنه بيخليك 

1- تتعلم و تجرب بإيدك في مشاريع فعلية.. صحيح أصغر بس مشاريع 

2- بينشف عضمك و بيديك خبرات في كتير من الأقسام

و دة طبيعاً بجانب سهولة إنك تدخلها كشركة. 

و دي يمكن من مميزات و عيوب ال Digital Media.. و هي إنها أتاحت فرص كتير جداً.. لكن في نفس خلت المناسفة رهيبة 

زمان عشان كنت توصل كان صعب لكن بمجرد ما بتدخل المجال كدة كدة شغلك هيتشاف و هتتعرف.. عشان العدد كان قليل. 

لكن دلوقتي دخولك للعالم دة سهل.. لكن تميزك صعب جداً.. أولاً بسبب العدد الرهيب.. ثانياً إن معايير التميز نفسها مبقتش معروفة و محددة. 

في النهاية لو عاوز مني نصيحة واحدة إزاي أشتغل في عالم الإعلانات فهيكون ردي عليك.. شوف مسلسل Mad Men